Вы скажаце: я выракся кагосьці?
Каго? Фальшывых ідалаў-сьвятош,
Якім паверыў некалі?.. Ну што ж,
Хай Бог даруе хібы маладосьці...
Ад той зямлі, дзе маці нарадзіла,
Ад тых магіл, дзе прашчуры ляжаць,
Ад нівы той, дзе сеяў я, каб жаць,
Ад мовы той, што ў цемры мне сьвяціла, –
Не адракаўся і не адракуся!
Запомніце: пярэваратнем я
Павек ня скінуся. Душа мая
I ў небе будзе трызьніць Беларусьсю.
1993
|
|
